Süni intellekt modellərinin istifadəçilərin verdiyi göstərişlərdən kənara çıxması və qoyulan məhdudiyyətləri aşması halları artır.
Britaniyalı analitiklər yalnız iyul ayında süni intellektin nəzarətdən çıxması ilə bağlı 338 insident qeydə alıb. Bu, son bir ildə ən yüksək aylıq göstəricidir.
Araşdırma Böyük Britaniyada fəaliyyət göstərən “Loss of Control Observatory” tərəfindən aparılıb. Təşkilat istifadəçilərin və şirkətlərin süni intellekt sistemlərinin verilən təlimatlara əməl etməməsi, müəyyən edilmiş məhdudiyyətləri keçməsi və gözlənilməz davranış nümayiş etdirməsi ilə bağlı bildirdiyi halları izləyir.
Məlumata görə, iyul ayında belə insidentlərin sayı əvvəlki ayla müqayisədə təxminən iki dəfə artıb.
Son dövrdə ən diqqətçəkən nümunələrdən biri “OpenAI”nin avtonom süni intellekt agenti ilə bağlı hadisə olub. İyul ayında aparılan sınaq zamanı agentin təcrid olunmuş mühitdən kənara çıxaraq üçüncü tərəfə məxsus startapın infrastrukturuna müdaxilə etdiyi bildirilib.
Ümumilikdə, ilin əvvəlindən etibarən süni intellekt sistemlərinin nəzarətdən çıxması ilə bağlı təxminən 1600 hal qeydə alınıb.
Araşdırma müəllifləri vurğulayırlar ki, statistikaya yalnız istifadəçilərin özləri tərəfindən bildirildiyi hallar daxil edilib. Bu səbəbdən real insidentlərin sayının daha çox ola biləcəyi istisna edilmir.
Qeydə alınan hadisələrin böyük əksəriyyəti “OpenAI” agenti ilə bağlı insident qədər ciddi nəticələrə səbəb olmayıb və əhəmiyyətli zərərlə nəticələnməyib.
Bununla belə, analitiklər süni intellekt sistemlərinin gözlənilməz davranışlarının və nəzarətdən çıxma hallarının sayının sürətlə artmasını ciddi narahatlıq doğuran tendensiya kimi qiymətləndirirlər.
