Azərbaycanda mayın 1-dən maska tələbinin ləğv edilməsinə müxtəlif reaksiyalar gəldi. Yeni qərarla bağlı xalq artisti Faiq Ağayev də yumoristik paylaşım edib.
Redaksiya.az həmin paylaşımı təqdim edir:
“Səninlə çox çətin zamanda, hamının qorxu içində yaşayan dönəmdə tanış olduq.
Kənardan baxanlar “heç yaraşmırlar da bir-birinə” dedi. Amma biz insanlarla dolu bu bom-boş həyatda arxa-dayaq olduq bir-birimizə. Tam olduq.
Sənə sonsuz inamla bağlandım.
Sonra, arada məni sənsiz gəzən gördükdə, “yaraşmırlar” deyənlər, nədən ayrı qaldığımızla maraqlanmağa başladılar.
Qınadılar, dedilər “olmaz belə, cəzalandırın onu, qoy cəfasını çəksin!”.
Qışqırdılar, hədə-qorxu gəldilər, daş-qalaq etməyə belə hazır idilər.
Sevgisizlər…
Bilmədilər ki, səni canımdan iraq tutmağım, sənsiz gəzməyim – etirazımdır. Qaydalara, vəfasızlara, bəyənən və bəyənməyənlərə. Sevgililər dəli olur axı…
İndi yad əllər zorla ayırır bizi…
Daş qəlblilər…
Ayrılma tarixini bilə-bilə yaşamaq dəhşədir… Çaşqınam, heç bilmirəm ki, əbədi sənsizlik necə olacaq.
Dedilər – “unut, onsuz nəfəs almaq belə sənə rahat olacaq”.
İnsafsızlar…
İnanmaq istəmirəm.
Birliyimizə xor baxanlar sevinir indi.
Tək qaldım…
Əlvida, maska…”